Don Oreste e la Befana

Urli, rabaltamenti e s-ciafoni: la canonica de don Oreste la pareva un ramo del parlamento italian, solo pì educato.

A fare tuta sta baraonda i jera i quatro nevodi del paroco, che so sorela la ghe gaveva lassà par un paro de sere. La pora dona la jera dovù andare a torse el marìo, che el jera scapà co na carovana de singani. Ala fine, sicome el jera un ronpibale, questi i ghe gaveva dà na bastonà in testa e i lo gaveva molà a Isola dela Scala, dentro na ostaria. Cussì, no savendo cossa fare co i quatro demòni che la gaveva messo al mondo, la dona la gaveva pensà ben de lassargheli al fradeo prete.

Se tratava de esseri mostruosi, pì vissini ala simia e al ramapiteco che a putini normali. Par farli indormessare la ghe dava dele cicare piene de late e graspa. Ansi, pì graspa che late. A dire el vero le jera scodele de graspa pura, ma ormai i bocia i jera asuefati e no i ghe faseva pì caso. I jera stà espulsi da tute le scole dela zona e in un caso i gaveva anca robà la machina de na maestra, fasendola volare dentro el lagheto de Negrelo a Baon. Figurarse la voja che el prete gaveva de torse in casa sti mostri rompitotani. Dopo un quarto d’ora che i jera in canonica i gaveva za spacà tre veri zogando a balon in tinelo e i voleva magnarse le particole co la marmelata.

So mama i gaveva ciamà Bepin, Toneti, Gigin e Lorensin. Ma tanto valeva se la ghe gavesse messo nome Adolfo, Giuseppe, Pol Pot e Belzebù, da quanto che i jera scaenà.
Uno el jera biondo, quel’altro gaveva i cavej rossi, n’altro ancora el jera moro terigno e l’ultimo, el pì picolo, el gaveva parfin la barba a ponta. Efetivamente la Nina, in gioventù, la jera sta un pochetin putana e l’unico vero fiolo de so marìo el jera quelo coi cavej neri.
Quel’altri invesse i jera fruto de aventure passeggere coi postini del paese e co uno che ghe gaveva contà de essare un dissentende direto de Leonida da Sparta. Tanto el cognà de don Oreste el jera fiapeto, picenin e senpre inbriago. La Nina invesse la jera alta e grossa, e co un pugno na volta la gaveva parfin rabaltà un musso. Quindi el cornuto taseva e stava bon.

«Ragassi – ga sbotà a un certo punto el prevosto, inviperìo – se no ghe tasì ve mando a dormire nel fienile de Toni Sauron, coe pantegane che ve magna i piè». Ma el gavaria podù dirghe anca quaraquaquà oink oink, parchè tanto i bòcia no i lo ga cagà gnanca de strissio. Alora el don se ga davero insustà e el ga tirà fora el matarelo, scominsiando a menare ala cieca nel nugolo de sbereghi e ramenamenti. Co tre bastonà ben assestà el li ga calmà, ma bisognava trovare qualcossa par tegnerli boni, senò la andava a finire come prima.
«Se no stasì boni la Befana no la ve porta gnente, rassa de porcarie. Anzi, la ve porta solo carbon» el ga dito, tentando la sorte. La consegna dele bestie la jera infati avegnù nel dopo disnà del dì prima del’Epifania.
«Chi zela la Befana?» ga risposto Bepin.
«Mi ghe pisso sula Befana, cossa voto che me ne ciava» ghe ga fato eco Toneti, che jera quelo pì educato.
«Cossa zelo el carbon?» ga domandà alora Gigin, ignorante come na nutria.
«Chi zelo sto prete?» ga concluso Lorensin, che sofriva de perdite de memoria a breve termine.
«Ben semo messi – pensava intanto el paroco – qua se no me invento qualcossa de interesante i me sassina la canonica e me toca sararli dentro un confesionale fin doman matina».
Co un colpo de matarelo el li ga sentà tuti in divano, metendose su na carega davanti. Par soraconto el ghe ga inpenìo quatro scodele de graspa e late caldo, guadagnando qualche secondo. Proprio in quelo Toneti se ga alsà dal divano e, preda dei fumi del’alcol, el ga tentà de cucarghe la botilia de graspa al paron de casa. El quale, in tuta risposta, ghe ga tirà na manganelà in testa. Parchè a don Oreste te podevi tocarghe tuto, ma no la so graspa preferìa. Purtropo el matarelo se ga spacà in do tochi, mandando a ganbe par aria el putelato. Che nel fratenpo el ga scominsià a rodolarse par tera come na trotola, cantando a pien buso «La bambola» de Patty Pravo. I altri tre i ghe ze subito saltà de sora, spuandoghe dosso e dandoghe dei peladoni nel sterno.

Sensa matarelo e ormai fora de lu, don Oreste el ze corso in cusina par sercare qualcossa de duro da darghe sula zaba ai scaenà. L’unica roba che ghe ze vegnù in man ze sta la scoa che la perpetua la doparava par netàre par tera. El don el ze corso in tinelo roteando la scoa come na scimitara e i bocia i ze restà imagà a vardarlo.
«Cossa zela quela roba, zio?» ze saltà fora Bepin.
«Che roba strana, ciò» diseva intanto Gigin.
«Chi zelo sto prete?» ga ripetù Lorensin, che intanto el se jera za desmentegà tuto.
«Tu mi fai girar, tu mi fai girar come fossi una bambola» cantava da par tera Toneti, che continuava a rodolare a velocità stratosferica.
«Ciò, putei, ma la vaca de vostra mama no la dopara miga la scoa in casa?» ga risposto don Oreste. El quale saveva che so sorela la jera un poco sossolona, ma no’l pensava cussì tanto.
«No – ga risposto in coro i quatro insemenii – de solito la rabalta par tera el popà e dopo la lo strassina in giro».
«Ben ragassi, questa la ze na scoa e no la serve solo par netàre la casa. Na volta a l’ano, nela note del’Epifania, la Befana ghe monta dessora e la ghe fa el giro del mondo par portarghe i dolzi ai putini boni».
«E a queli cativi ghe portela dei stronsi?» ga domandà alora Toneti, dando enesima prova dela so educassion.
«No, ebete. La ghe porta el carbon. Se adesso stasì boni qua sentà ve conto na storia dela Befana che me ze sucesa a mi quando che jero putin come vialtri. Ve piasarìa sentirla?» ze sta la proposta del paroco, che se ga inpissà un toscan prima de scominsiare el raconto.
«Contane tuto, zio» ga risposto solenemente i quatro putéi, inpissandose anca lori un toscan.

Tornemo indrio de tanti ani, quando che don Oreste el jera ancora un bòcia. Un puteato de canpagna che el gaveva in mente de tuto, ma no che un dì el sarìa deventà un prete.
A chel tenpo no ghe jera miga Babo Nadale e tute le robe che ga trasformà le Feste in un luna park magnaschei. Na volta rivava solo Befana e befanon, nele canpagne intorno ai coli Euganei. E quando che i rivava, de note e col giasso, i putèi i jera za andà in leto da un toco.
Anca parchè la matina dopo ghe tocava andare a messa prima, intorno ale sete de matina. E comunque ghe jera senpre da lavorare in casa o fora, quindi nissun gaveva voja de stare alsà fin tardi. Sensa television, radio e conputer, la zente dormiva o al massimo qualche fortunà riussiva a farse na ciavadina invernale. Naturalmente in silensio, parchè senò in camara tuti sentiva tuto quanto.

Ma quela note Oreste el gaveva deciso de stare svejo par vedare sta famosa Befana e cussì el se jera sconto soto ala tola, nela cusina dela vecia casa de fameja. Sul fogolaro el gaveva parecià un bel goto de graspa par el befanon, un tochetin de pan dolse e anca el magnare par el mussetto del visitatore noturno. El jera quasi drìo indormessarse, verso mezanote, quando che el ga sentio un rumore de canpanei rivare da fora. Jera un scuro bestia, sensa lanpioni e luci eletriche. E in pì giasso e nebia gaveva fato deventare la canpagna intorno un camaron scuro e fredo. De colpo la porta se ga verto e ze vegnù avanti na figura tuta intabarà. In testa el befanon el gaveva un capelo senpre grando, che ghe coverseva anca i oci: el tegneva in man un ciàreto de lata e vero, par farse un poca de luce. In spala el portava un saco de juta tuto gonfio de pan co l’ua, stracaganasse, bagigi e fruta seca. E anca un pochetin de carbon, parchè i putei de Baon i jera sta anca parecio cativi durante l’ano.

Oreste, che no’l jera proprio farina da fare ostie, el jera sta parecio ronpibale e el saveva che col carbon che ghe sarìa tocà el podeva far andare el Titanic fin in America e ritorno. La pezo el la gaveva conbinà quando che el gaveva organisà na gara de slite trainà dai pitoni de so nono. Nel tentativo de far partire la slita sula neve jera perii miseramente venti pitoni e anca un paro de galine, che doveva servire par rinforso. Le pore bestie le jera desfà dal sforso e le faseva «gologologolo» a tuto alè, ma la slita no la voleva movarse. Alora el guidatore, sperando de farghe ciapare paura, el gaveva butà un petardo in mezo ai piti, che in teoria i doveva partire a razo. Pecà che, invesse de un petardo, el picolo satanasso gabia usà un candeloto de dinamite robà ala cava de Calaon. Al posto del traino de pitoni ze restà un buso fondo un metro e la piova de pene ga inperversà sula zona par un paro de giorni.
Anca le s-ciafe le jera piovù come tenpesta sula zaba del’asasino de pitoni, che però el gaveva pì paura del befanon che dele sberle.

E cussì, quando che la figura intabarà la ze sta a tiro, el bòcia el ghe ga tirà na bastonà seca sui sentimenti. El befanon ga cavà do porchi e dopo el ze andà al tapeto, come se el gavesse ciapà na megola da Carnera. Pian pianeto Oreste el ghe ze andà vissin e, tegnendo el fià, el ghe ga cavà el capelo. Figurarse la sorpresa quando che el ga scoverto che el befanon no’l jera altri che Piereto Mandolari, uno dei agricoli che abitava nele vicinanse de casa sua.
In chel momento ghe ze cascà el mondo dosso: el befanon no’l jera so marìo de la befana, ma un aiutante scelto sul posto par allegerirghe el lavoro ala strigheta. E lu el gaveva rovinà tuto, metendo ko el garzon dela vècia.

Imediatamente el ga tentà de far resusitare Piereto dandoghe un goto de graspa.
Mandolari el jera noto in tuto el basso Veneto par essare uno dei pì gran amanti dela graspa e el se ga tacà al bicere. El primo goto ze deventà do, tre e dopo quatro cicare colme de alcol a 60 gradi.

«Oreste – diseva el poareto co la vosse ormai inpastà – sito sta ti a darme na bastonà in testa?».
«No caro, te te si scapussà sul gato finchè te vegnevi dentro» rispondeva el busìaro, che voleva salvarse la caponara.
«Bravo – ga dito alora el befanon – usque tandem Catilina ronparne le bale sula strada de Batallia…». Sta ultima frase la jera el segno che la bastonà e la graspa le gaveva ormai fato efeto. E che el poro Mandolari el jera ormai pì vissin al regno vegetale che ala rassa umana.
Alora Oreste el ga avù l’iluminasion. Ghe tocava a lu metarse in spala el saco, ciapare el musso del befanon e intabararse par ben e andare a portare i bagigi e i dolsi ai putini dele canpagne vissin.

In do minuti el se ga vestìo, el ga ciapà el saco in spala e el ze partìo nela note freda e umida.
No podemo savere come che la sia andà da sto punto in avanti, parchè el protagonista dela storia no’l ghe la ga mai contà del tuto a nissun. Fato sta che ala matina dopo tute le case gaveva le so calsete tacà al camin. E tute le calsete le jera piene de ciocolata, biscoti, naranse e nose. E no ghe jera carbon par nissun. Parchè tuto el carbon el jera finìo nela calseta de Oreste.
Ma da chela volta, ogni ano, el bòcia pì velenoso dela bassa padovana el se ga vestìo da befanon par portarghe i regali ai putèi. Anca parchè Mandolari no’l se ga pì ripreso dala bastonà e dala graspa dela note de l’Epifania e el se ga trasferìo in America, dove che el ga fato fortuna come colaudatore de elmeti par l’esercito statunitense.

«La nostra storia la finisse qua, nevodeti cari. Ve zela piasesta?» ga domandà don Oreste ala fine del raconto.

Ma i giàonsei i dormiva za da un tochetin, inbriaghi e obnubilati dal fumo dei sigari toscani. Alora el paroco el ghe ga messo dessora na bela querta, parchè no i ciapesse fredo. E dopo el ze andà nel sotoscala, dove che el se gaveva parecià un bel saco de juta. Dentro el ghe gaveva messo, insieme ai parochiani de Santa Maria Sconta, tanta roba bona da magnare. Parchè no’l gaveva pì smesso, da chela volta, de fare el befanon. El musso dei Bassan faseva la so parte, portando el saco e fasendo sonare le canpanele. E tuti i putèi del borgo i podeva svejarse la matina del’Epifania e corare soto el camin, par vardare se la Befana la ghe gaveva portà anca del carbon. Ma quelo no’l ghe jera mai, parchè el jera finìo tanti ani prima tuto nela calseta de un bòcia de nome Oreste.