Par frizare:

Pan gratà, ovo, ojo o butiro.

Eco come che la se fa:

Par prima roba destregolare la vanilia, dividendo i semeti e la sgussa.

Dopo se ciapa el late e la pana, e li se mete in te na tecia alta: se zonta la scorsa dela vanilia e se alza el fogo, fin quando che el late el taca a bojare.

In te n’altra teceta se mete le balote dei ovi coi semeti de vanilia e se sbate tuto insieme al sucaro. Dentro sto pocio se ghe mete l’amido de mais e la farina, e tuto se zonta al late cola pana scaldà. Me racomando: cavé la scorsa de vanilia che dopo la scrissia.

A sto punto se smissia tuto par ben e se rimete sul fogo basso. Sensa smetare de smissiare, se fa infissir la crema fin quando che la ze cota.
Sensa perdare tempo, ciapé la crema e la metì dentro na pignata da forno de quele larghe e basse, in modo che la vegna alta do dei. Ma no stasì metarla in frigo o querta, che la se mola tuta. La lassé che la vegna freda par conto suo.

Fine dela prima parte: bevive un goto de vin dolze par riposarve dale fadighe.

Par la seconda parte bisogna preparare tre scuele: nela prima ghe va el pan gratà, nela seconda l’ovo sbatù e nela terza ancora pan gratà. Intanto se mete sul fogo na pignatela alta e streta piena de ojo. Qualcun el dopara el struto, beati lori. Nei veci ricetari che gò consultà par sta riceta i doparava anca el butiro.

Se ciapa la pignata cola crema, che intanto la ze vegnù freda, e se taja la crema a ronbi, come queli del costume de Arlechin.

Ogni singolo tocheto vien pasà prima nel pan gratà, dopo nel’ovo e uncora nel pan gratà. Po’ via nel’ojo de bojo (o struto, o butiro) fin quando che el vien dorà.

Se suga co un toco de carta e se magna sta meraveja bela calda. Ma atension, che fora la pare freda e par dentro la zé cofà l’inferno.

Eco, questa la ze la riceta. Ma se no gavì voja de far fadiga ndasì pure in serca par Venesia e Ciosa: trovaré dele creme frite da capotarse!