Metivela via. Co le faìve dei bugnei portà dal vento va in archivio anca ste Feste. Ciamelà strigheta, bugneo, panevin, pirola o come che volì, ma la sostansa no la canbia de na virgola: Nadale el ze andà, soto co carnevale.
In Veneto le ze tante le tradission de sto periodo de l’ano, ma una la me ze particolarmente cara: quela dela pinza, da gustare coi amissi davanti al bugneo dela vecia insieme a un goto de vin caldo. Cossa che la ze la pinza? Se trata de un dolze tipico del Veneto, povero come ingredienti, ma rico de storia e soratuto de gusto!
Eco qua ingredienti e riceta, rigorosamente in veneto. Li gò tirà fora da un vecio libro che gavemo in casa da un mucio de tenpo. Ogni fameja, infati, la ga la so pinza, che la canbia a seconda dele zone e dele tradission.
Ingredienti
Farina da polenta: do eti e mezo
Farina bianca: un eto e mezo circa
Sucaro: un eto
Fighi secà: do eti
Pomi: sié eti
Ua sultanina: 80 grami
Struto: mezo eto
Late: un litro
Sale e graspa
Preparasion
Se parte scaldando el late e zontandoghe pian pian la farina de formenton, come che se farìa par fare la polenta. Bisogna mescolare pian pianeto, che no la se taca e che no la fassa grumi. Quando che la boje la se cava dal fogo.
A parte gavarì parecià na terina co dentro fighi e pomi tajà a tochetini, insieme a l’ueta e al sucaro. Se cala la “poenta” de late e farina zala nela terina e se smissia ben tuto quanto. Durante la lavorassion se buta na s-cianta de sale e na giossa de graspa o rum, ma apena apena me racomando!
A sto punto se mescola tuto par ben, zontandoghe el struto. Ala fine se buta anca la farina bianca, senpre mescolando, par darghe la consistensa giusta. El conposto va passà infine dentro na teglia e po’ via in forno a 160/180 gradi. La cotura la ga da durare almanco un’ora, anca un’ora e 20, e la pinza la va cavà dal forno solo quando che la ze bela scura. Par mi la ze pì bona cota nel forno dela cusina economica.
Ma ala fine la diferensa la fa senpre la conpagnia: pì amissi i la gusta insieme, pì bona la ze la pinza!
L'Insaziabile 