El massin el ga el corteo nela man destra e co la sanca el ghe struca el sgrugno. Po’ el ghe tirà na scortelà nel colo, dove che ghe ze l’arteria pì importante: na s-cianta de tenpo e sarà tuto finìo. No la ze na scena de un film sui contadini veneti del secolo scorso, ma un basorilievo che la ripropone da otosento ani. Par la precision se trata dela rapresentasion del mese de disenbre nel portale grando dela basilica de San Marco, a Venesia.

Un omo co la barba el copa el mas-cio come che se faseva nel mile e dozento, quando che el ze stà scolpio el portale dela cesa venesiana. E le robe no le ze canbià de tanto fino a na sbrancà de ani fa. Altre conferme le riva da cese medievali in giro par l’Italia, come la catedrale de Otranto, dove che el mese de disenbre el ze rafigurà senpre in sto modo.

Parché?

Parché par copare el porseo bisognava spetare San Tomaso, che na volta cascava el 21 de disembre. No ghe jera frighi nele case e la carne la se conservava mejo grasie al fredo, che in sti giorni de l’ano el faseva batare le broche ala zente. Ovio che i poareti no i podeva permetarse de mantegnere un mas-cio, ma a quel tenpo i porsei i viveva in stato de semilibertà fra le foreste e le aree abità. Quindi i jera pì picenini – e el basorilievo de San Marco el lo conferma – e le fameje contadine le gaveva la posibilità de metare via un poca de carne de quela bona.

Picola curiosità: in alto nel basorilievo de San Marco un drago o basilisco el ghe morsega el peto a na dona. Secondo i studiosi se podaria tratare de un avertimento: ocio a magnare massa carne, parché la porta drito al pecato de lusuria!